धारदार सत्तूर घेऊन फिरणाऱ्याला पोलिसांनी पकडले

पोलीस निरीक्षक भानुदास पिदुरकर यांच्या मार्गदर्शनाखाली 15 जून 2026 रोजी वणी पोलीस स्टेशनचे पथक शहरात गस्त घालत होते. दरम्यान रंगारीपुरा भागात एक इसम संशयास्पद हालचाली करताना पोलिसांच्या नजरेस पडला. पोलिसांनी त्याच्यावर बारकाईने लक्ष ठेवत तात्काळ त्याला अडविले.

चौकशीदरम्यान इसम गोंधळलेला दिसून आला. संशय बळावल्याने पोलिसांनी त्याची झडती घेतली असता त्याच्या ताब्यात एक धारदार लोखंडी सत्तूर आढळून आला. सार्वजनिक ठिकाणी अशा प्रकारचे घातक शस्त्र बाळगल्यामुळे पोलिसांनी तात्काळ ते जप्त करून आरोपीला ताब्यात घेतले. अटक करण्यात आलेल्या आरोपीचे नाव महेश रमेश मोहबिया (वय 35, रा. रंगारीपुरा, वणी) असे आहे. प्राथमिक तपासात तो गंभीर गुन्हा करण्याच्या उद्देशाने हे शस्त्र बाळगून फिरत असल्याचा संशय पोलिसांनी व्यक्त केला आहे.

या प्रकरणी आरोपीविरुद्ध शस्त्र कायद्यान्वये गुन्हा दाखल करण्यात आला असून पुढील तपास सुरू आहे. “शहरात बेकायदेशीर शस्त्रे बाळगणारे आणि गुन्हेगारी प्रवृत्तीचे व्यक्ती कोणत्याही परिस्थितीत खपवून घेतले जाणार नाहीत. अशा घटकांविरोधात कठोर कारवाई यापुढेही सुरू राहील,” असा स्पष्ट इशारा वणी पोलिसांनी दिला आहे.