विवेक तोटेवार, वणी: एका अनोळखी इसमास (वय अंदाजे 45 ते 50) बेदम मारहाण करण्यात आली. या मारहाणीत सदर इसम हा गंभीर जखमी झाला असून त्याची प्रकृती अत्यवस्थ असल्याची माहिती आहे. यवतमाळ रोडवरील बाकडे पेट्रोल पम्पाजवळ बुधवारी सकाळी 6 वाजताच्या सुमारास ही घटना घडली. या प्रकरणी मारहाण करणारा अनिकेत दादाराव कुमरे रा. सिंधी ता. मारेगाव याच्यावर गुन्हा दाखल करण्यात आला आहे. तर अनोळखी इसमाला आधी वणीहून चंद्रपूर व नंतर नागपूर येथील शासकीय रुग्णालयात उपचारासाठी रेफर करण्यात आले आहे.
बुधवारी सकाळी 6.30 वाजताच्या सुमारास वणी पोलीस स्टेशनमधल्या एका कर्मचा-याचा मोबाईल खणखणला. त्यांना माहिती मिळाली की यवतमाळ रोडवरील बाकडे पेट्रोल पम्पजवळ एक इसम गंभीर जखमी अवस्थेत पडून आहे. माहिती मिळताच पोलीस पथकाने घटनास्थळ गाठले. तिथे त्यांना एक मध्यम वयाचा इसम रक्तबंबाळ अवस्थेत आढळला. त्याला तोंडाला व डोक्याला भीषण मार लागलेला होता. त्याचे कपडे बाजूला पडलेले होते. तर अंगावर केवळ अंडरविअर होती. सदर इसम इतका गंभीर जखमी होता की तो बोलण्याच्या मनस्थितीत नव्हता.
बुकिंगसाठी बॅनरवर क्लिक करा...
पोलिसांनी लगेच एक ऑटो बोलावला. जखमीला एका ऑटोत टाकून ग्रामीण रुग्णालयात उपचारासाठी दाखल केले. मात्र प्रकृती गंभीर असल्याने तिथल्या डॉक्टरांनी प्राथमिक उपचार करून जखमीला चंद्रपूर येथे रेफर केले. जखमीला आधी चंद्रपूर येथे उपचारासाठी दाखल करण्यात आले. मात्र प्रकृती अत्यवस्थ असल्याने त्याला नागपूर येथील शासकीय रुग्णालयात रेफर करण्यात आले.
सीसीटीव्हीतून बेदम मारहाण उघडकीस
पोलिसांनी घटनास्थळाजवळील सीसीटीव्ही फूटेज चेक केले असता त्यांना एक इसम जखमीला बेदम मारहाण करताना आढळला. मारहाण करणारा सीसीटीव्हीत कैद झाल्याने पोलिसांनी खबरीद्वारे त्याची माहिती काढली. मारहाण करणा-या इसमाची ओळख पटली. मारहाण करणारा इसम हा अनिकेत दादाराव कुमरे रा. सिंधी ता. मारेगाव येथील रहिवासी असल्याचे पोलिसांना समजले.
पोलिसांनी तातडीने आरोपीविरोधात बीएनएसच्या कलम 118 (2) नुसार गुन्हा दाखल केला. बेदम मारहाण का केली याचे कारण अद्याप कळू शकले नाही. असे कोणते कारण होते की जखमीला प्रकृती अत्यवस्थ होत पर्यंत मारहाण करण्यात आली. त्याच्या अंगावर केवळ अंडरविअर का होती. तसेच सदर इसमाला परिसरातील कुणीच का ओळखत नव्हते. तसेच जखमी त्या ठिकाणी भल्या सकाळी कशासाठी आला होता. असे अनेक प्रश्न मारहाणीमुळे उपस्थित झाले आहे. प्रकरणाचा तपास वणी पोलीस करीत आहे.
वणी व परिसरातील ताज्या बातमी आणि घडामोडी जाणून घेण्यासाठी वणी बहुगुणीचा फेसबूक गृप जॉईन करा…
https://www.facebook.com/groups/241871233000964/
Comments are closed.