रानडुकराचा गुराख्यावर हल्ला, गुराखी जागीच ठार

विवेक तोटेवार, वणी: तालुक्यातील कायर (पिंपरी) येथील जंगलात बकऱ्या चारत असताना एका शेतमजुरावर रानडुकराने हल्ला केला. या हल्ल्यात नामदेव सोयाम (65) नामक शेतमजूर जागीच ठार झाला आहे. आज मंगळवार दुपारी 2 वाजताच्या सुमारास ही घटना घडली. नामदेव हा स्वतःच्या व इतरांच्या बकऱ्या चरायचे व शेतमजुरीचे काम करायचा. आज तो नेहमी प्रमाणे कायर नजिक असलेल्या जंगलात बक-या चारायला घेऊन गेला होता. दरम्यान दुपारी 2 वाजताच्या सुमारास झुडपात असलेल्या रानडुकराने अचानक नामदेव यांच्यावर हल्ला केला. या हल्ल्यात नामदेव याला पळून जाण्याचीही संधी मिळाली नाही. या हल्ल्यात नामदेव यांचा जागीच मृत्यू झाला. घटनेची महिती वनविभाग व मुकुडबन पोलिसांना देण्यात आली आहे. नामदेव यांच्या मागे पत्नी, दोन मुले, सुना व नातवंड असा मोठा आप्तपरिवार आहे.

बुकिंगसाठी बॅनरवर क्लिक करा...