दुचाकीचा अपघात, विवाहित तरुण ठार

विवेक तोटेवार, वणी: नातेवाईकाची दुचाकी घेऊन घरी जात असलेल्या एका तरुणाचा दुचाकी नाल्यात कोसळून मृत्यू झाला. मंगळवारी दिनांक 17 सप्टेंबर रोजी सकाळच्या सुमारास ही घटना उघडकीस आली. उमेश मारोती सातपुते (35) रा. शेलु (खु.) असे मृत तरुणाचे नाव आहे. सोमवारी दिनांक 16 सप्टेंबर रोजी संध्याकाळी उमेश हा गावातील गणेशोत्सवात सहभागी होता. त्यानंतर रात्री 10 वाजताच्या सुमारास तो त्याचा मित्र गणेश शंकर चिकटे याची दुचाकी (MH 29 AF 6628) घेऊन नांदेपेरा येथे निघाला. मात्र गावालगत असलेल्या नाल्यात त्याची दुचाकी कोसळली. पहाटेच्या सुमारास गावातील लोकांना पुलाखाली एक दुचाकी व दुचाकीस्वार पडून दिसला. काहींनी दुचाकी गणेशची असल्याचे ओळखले. तर दुचाकीजवळ पडून असलेला युवक हा उमेश असल्याची ओळख पटली. गावातील लोक घटनास्थळी गोळा झाले. याबाबत वणी पोलिसांना माहिती देण्यात आली. उमेश याला वणीच्या ग्रामीण रुग्णालयात दाखल करण्यात आले. परंतु डोक्याला गंभीर मार उमेश याचा मृत्यू झाल्याचे डॉक्टरांनी सांगितले. दुचाकी चालवताना तोल गेल्याने दुचाकी कोसळली व त्यातच उमेशचा मृत्यू झाल्याचा प्राथमिक अंदाज बांधला जात आहे. मात्र हा अपघात आहे की घातपात हे उत्तरिय तपासणीचा रिपोर्ट आल्यानंतर कळेल. उमेश याच्या पश्चात आई वडील, पत्नी, दोन मुली असा आप्त परिवार आहे. घटनेचा तपास वणी पोलीस करीत आहे.