धक्कादायक…. चिलईच्या शेतकऱ्यांच्या जमिनीचा परस्पर केला व्यवहार

तालुका प्रतिनिधी, वणी: पिढ्यानपिढ्या मालकी हक्काच्या आणि वहिवाट सुरू असलेल्या शेतजमिनी एका डोलोमाईट व्यावसायिकाला प्रशासनाने परस्पर लिजवर करून दिल्याचा धक्कादायक प्रकर उघडकीस आला आहे. त्यामुळे एकच खळबळ उडाली आहे. वणी तालुक्यातील चिलई येथील शेतकरी चालू हंगामात खरीप पिक कर्जासाठी सातबारा काढण्यासाठी गेले असता सातबारा हातात पडताच सदर संतापजनक प्रकार उघडकीस आला. संबंधित शेतकऱ्यांना अंधारात ठेऊन भूमिहीन करण्यात आले. या गंभीर प्रकरणात संबंधित तालुका प्रशासकीय कर्मचारी आणि अधिकारी गुंतले असल्याचा शेतकऱ्यांचा आरोप आहे.

चिलई येथील गट क्र. 22, 23, 24, 29, 32, 33, 34, 35, 36, 37, 40 यातील एकूण क्षेत्र 61•91 हेक्टर आर शेतकऱ्यांच्या मालकी हक्काची शेतजमीन मंत्रालय प्रशासनाने महाराष्ट्र शासन यांचा आदेश क्र. MMN – 2099 / 7707 desk – 4, trade commerce and mining department mantralaya  Mumbai  दि.08 / 01 / 2001 नुसार मोहम्मद अब्दुल कदिर मोहम्मद हनिफ रा. वणी यांना 30 वर्षांकरिता डोलोमाईट खनिजसाठी (लीज) कायदेशीर करार करून देण्यात आली. त्याअनुषंगाने स्थानिक तहसिलदार यांनी संबंधित व्यावसायिकाने केलेल्या अर्जावरून शेतकऱ्यांच्या मालकी हक्कातील जमिनीच्या सातबारा उताऱ्यावर ईतर अधिकारात नोंद घेण्याचे आदेश तलाठ्याला दिले. 

ही तर आमची फसवणूक – शेतकरी

जमिनी डोलोमाईट प्रकल्पासाठी लिजवर देण्यासंदर्भात पर्यावरण विभागाने दोनदा जनसुनावणी घेतली. मात्र शेतकऱ्यांना जमिनीचा योग्य मोबदला मिळत नसल्याने प्रकल्पास जमिनी देण्यास संबंधित सर्व शेतकऱ्यांचा विरोध होता. जमिनी आमच्या मालकी हक्काच्या आहेत. त्या देणे अथवा न देणे आमचा हक्क आहे. सध्यस्थीतीत आम्ही जमिनी विकलेल्या नाही. किंवा संबंधित व्यावसायिकासोबत कोणताही करार अथवा आर्थिक व्यवहार झालेला नाही. आमची फसवणूक झालेली आहे. या प्रकरणात गुंतलेल्या संबंधित कर्मचारी, अधिकारी आणि संबंधित व्यावसायिकावर योग्य ती कार्यवाही झालीच पाहिजे, अशी आमची मागणी आहे. – जीवन गजानन झाडे, अन्यायग्रस्त शेतकरी रा. चिलई, ता. वणी

बुकिंगसाठी बॅनरवर क्लिक करा...