अबब! तृणधान्यांपासून तयार होतात एवढे पदार्थ!

पुरुषोत्तम नवघरे, वणी: आपल्या दैनंदिन आहारात तृणधान्यांचा समावेश असतो. मात्र याच तृणधान्यांपासून कल्पकतेने विविध पदार्थ तयार करता येतात. पोषण आणि कलात्मकतेचा संगम करू शकता. प्रधानमंत्री पोषण शक्ती निर्माण योजने अंतर्गत स्वयंपाकी, पालक यांची तालुकास्तरीय पाककला स्पर्धा झाली. ती येथील शिक्षण प्रसारक मंडळ विद्यालयात झालीय. या स्पर्धेत कितीतरी पदार्थ हे तृणधान्यांपासून तयार करता येतात, हे स्पर्धकांनी दाखविले.

या स्पर्धेच्या उद्घाटन सोहळ्याच्या अध्यक्षस्थानी पंचायत समितीचे विस्तार अधिकारी प्रकाश नगराळे उपस्थित होते. विस्तार अधिकारी नीलेश हेडाऊ, राज्य पुरस्कार प्राप्त मुख्याध्यापक गजानन कासावार हे प्रमुख अतिथी होते. या स्पर्धेत वणी तालुक्यातील 16 शाळांनी सहभाग घेतला.

बुकिंगसाठी बॅनरवर क्लिक करा...

या स्पर्धेअंतर्गत पहिल्या टप्प्यात शाळा स्तरावर पाककला स्पर्धा झाली. त्यात प्रथम क्रमांक मिळविणाऱ्या स्पर्धकांना या तालुकास्तरीय स्पर्धेत सहभागी व्हायचे होते. तृणधान्यांपासून तयार होणाऱ्या पदार्थांची ही स्पर्धा होती. यात स्पर्धकांनी विविध दर्जेदार पदार्थ तयार केलेत. या पदार्थांचे परीक्षण शिक्षण प्रसारक मंडळ विद्यालयाच्या शिक्षिका ज्योती महेश बडे, विवेकानंद प्राथमिक विद्यालयाच्या विजया बाबुराव देवाळकर यांनी केले.

या स्पर्धेत प्रथम क्रमांक 5,000 रूपये जि. प. उच्च प्राथमिक शाळा कृष्णाणपुरच्या कोमल चिकनकर यांनी, द्वितीय क्रमांक 3,500 रूपये जि.प.प्राथ. पिंपळगावच्या सारीका चिंचोलकर यांनी, तर तृतीय क्रमांक 2,000 रूपये जि.प. उच्च प्राथमिक शाळा निवलीच्या सविता मोहीतकर यांनी मिळविला.

या कार्यक्रमात अतिथीनी पोषण आहाराचे महत्त्व सांगितले. विद्यार्थ्यांना परसबागेतील भाजीपाला वापरण्याचा सल्ला दिला. सोबतच स्पर्धेत असलेल्या पदार्थांचा आहारात समावेश करण्याचे सुचवले. या कार्यक्रमाचे प्रास्ताविक देवराव चिडे यांनी तर संचालन अल्का काळे यांनी केले. आभार सपना वासेकर यांनी मानलेत. या स्पर्धेचे आयोजन शालेय पोषण आहार समन्वयक बुद्धराज वनकर यांनी केले.