केवळ स्वातंत्र्यच नव्हे तर अधिकार व शोषणाविरोधात शहीद भगतसिंगांचा लढा- कुमार मोहरमपुरी

बहुगुणी डेस्क, वणी: शहिद भगतसिंग यांचा इंग्रजांविरुद्धा लढा केवळ स्वातंत्र्यापुरता मर्यादित नव्हता. तर तो या देशातील शोषणाविरोधातही होता. जनतेचे मूलभूत अधिकार त्यांना मिळाले पाहिजे. जनतेला त्याचे हक्क प्राप्त करण्यासाठी संघटित होऊन त्याला संघर्ष करण्याचे अधिकार अबाधित असावे. यासाठीचा त्यांचा संघर्ष होता. त्यासाठीच सन 1929 साली संसदेमध्ये जनविरोधी जनसुरक्षा विधेयक (public safety bill) व कामगार विरोधी ट्रेड डिस्प्यूट बिल हे विधेयक ठेवले जाणार होते.

त्याचा विरोध करण्यासाठीच भगतसिंगांनी संसदेमध्ये बॉम्ब टाकला. ह्या विरोधातील पत्रके टाकून स्वतःला अटक करवून घेतली होती. यावरून त्यांचा संघर्ष कशासाठी होता हे लक्षात येतो. असे प्रतिपादन शहीद भगतसिंग, सुखदेव व राजगुरू यांचा शहीद दिनानिमित्त झालेल्या कार्यक्रमात मार्क्सवादी कम्युनिस्ट पक्षाचे जिल्हा सचिव कॉ. कुमार मोहरमपुरी यांनी केले.

बुकिंगसाठी बॅनरवर क्लिक करा...

राजूर येथील शहीद भगतसिंग चौकातील त्यांचा तैलचित्राला सामाजिक कार्यकर्ते डेव्हीड पेरकावार व मो. असलम यांच्या उपस्थितीत देशातील युवकांचे आदर्श व प्रेरणादायी व्यक्तिमत्व शहीद भगतसिंग, सुखदेव व राजगुरू यांना शहीद दिनानिमित्त अभिवादन करण्यात आले. यावेळेस डेव्हीड पेरकावार, जयंत कोयरे, महेश लिपटे, कॉ. ॲड. कुमार मोहरमपुरी यांनी उपस्थितांना भगतसिंगाचे विचार व कृती याबद्दलची माहिती दिली.

या झालेल्या छोटेखानी अभिवादन कार्यक्रमात गावातील गायक कलाकार राजेंद्र पुडके व नागो काळे ह्यांनी क्रांतिकारी गीते म्हणून उपस्थितांमध्ये जोश जागविला.या अभिवादन कार्यक्रमाला प्रामुख्याने पोलिस पाटील वामन बलकी, अशफाक अली, कैलास पाईकराव, अजय भुसारी, राकेश इग्रपवार, संजय कवाडे, स्नेहल वाळके, जब्बारभाई, पंधरे आदी प्रामुख्याने उपस्थित होते.