विवेक तोटेवार, वणी: वणी विधानसभेत शिवसेना (उबाठा) व महाविकास आघाडीचे अधिकृत उमेदवार संजय देरकर यांचा गुरुवारी वणी शेजारील गावात दौरा झाला तर दुपारी वणी शहरात भव्य रॅली काढण्यात आली. या रॅलीत महाविकास आघाडीचे सर्व प्रमुख नेते तसेच कार्यकर्ते उपस्थित होते. त्यामुळे यावेळी महाविकास आघाडीची वज्रमुठ दिसून आली. रॅलीत माजी आमदार वामनराव कासावार यांनी संजय देरकर यांना बहुमताने निवडून देण्याचे आवाहन मतदारांना केले.
सकाळी 8 वाजता वागदरा (नवीन) येथून प्रचाराला सुरुवात झाली. गावात पदयात्रा काढण्यात आली. त्यानंतर जुना वाघदरा या गावात प्रचार ताफा पोहोचला. हा गाव शिवसेनेचा गड असल्याने येथे भव्य पदयात्रा निघाली. गावचे माजी सरपंच महेश वैद्य यांच्या घरी संजय देरकर यांनी भेट दिली. त्यांच्या घरी संजय देरकर यांचे औक्षण करून शुभेच्छा दिल्या. संपूर्ण गावात पदयात्रा काढण्यात आली.
त्यानंतर लालगुडा या गावात प्रचार ताफा पोहोचला. भारतरत्न डॉ बाबासाहेब आंबेडकर यांच्या पुतळ्याला माल्यार्पण लालगुडा या गावात प्रचाराला सुरवात झाली. यावेळी देरकर यांनी बौद्ध विहाराला भेट दिली. संपूर्ण गावात ढोल ताशांचा गजरात पदयात्रा काढण्यात आली. या पदयात्रेत महिलांची संख्या अधिक होती. त्यानंतर चिखलगाव येथे प्रचार ताफा पोहोचला. गावाच्या मुख्य चौकात असलेल्या गाडगे महाराजांच्या पुतळ्याला पूजन व माल्यार्पण करून गावात प्रचाराला सुरवात झाली. पदयात्रेत ठिकठिकाणी नागरिकांनी संजय देरकर यांचे हार टाकून स्वागत केले. तर गावातील महिलांनी औक्षण करून संजय देरकर यांना शुभेच्छा दिल्या.
वणीत निघाली भव्य प्रचार रॅली
वणीतील साई मंदिर जवळील महाविकास आघाडीच्या प्रचार कार्यालयातून वणीत रॅली काढण्यात आली. सदर रॅली टिळक चौक, आंबेडकर चौक, टागोर चौक, सर्वोदय चौक, काठेड ऑइल मिल, गाडगे बाबा चौक, गांधी चौक, खाती चौक असा मार्गक्रमण करीत पुन्हा शिवाजी चौकात आली. या रॅलीत संजय देरकर यांच्या पत्नी किरण देरकर सहभागी झाल्या होत्या.
गांधी चौकात संजय देरकर यांनी सर्व व्यापाऱ्यांची भेट घेतली. त्यानंतर छत्रपती शिवाजी महाराज चौक य़ेथे रॅली पोहोचली. इथे छ. शिवाजी महाराजांच्या पुतळ्याला अभिवादन करण्यात आले. त्यानंतर एकता नगर पासून वळसा घेऊन रॅली तहसील चौकात आली. साई मंदिर येथील प्रचार कार्यालयात रॅलीची सांगता झाली.
रॅलीत माजी आमदार वामनराव कासावार, डॉ. महेंद्र लोढा, घनश्याम पावडे, आशिष खुलसंगे, टिकाराम कोंगरे, राकेश खुराणा, ओम ठाकूर, संजय निखाडे, सुनील कातकडे, कॉम्रेड दिलीप परचाके, कुमार मोहरमपुरी, राजू तुराणकर, प्रवीण खानझोडे यांच्यासह शिवसेना व महाविकास आघाडीचे नेते व कार्यकर्ते यांची उपस्थिती होती.
बुकिंगसाठी बॅनरवर क्लिक करा...
Comments are closed.