उद्या महाशिवरात्र निमित्त वणीतून निघणार भव्य त्रिशूळ यात्रा

बहुगुणी डेस्क, वणी: बुधवारी दिनांक 26 फेब्रुवारी रोजी महाशिवरात्रीनिमित्त वणी ते महादेवगड (शिरपूर) अशी 15 किलोमीटरची त्रिशूळयात्रा निघणार आहे. बसस्थानकाजवळील हनुमान मंदिरापासून सकाळी 8 वाजता या यात्रेला सुरूवात होणार आहे. या पदयात्रेचे 251 किलोंचा त्रिशूळ खांद्यावर घेऊन सर्व भाविक वणी ते शिरपूर अशी पदयात्रा काढणार आहे. शहराचे माजी नगराध्यक्ष तारेंद्र बोर्डे यांच्या संकल्पनेतून या पदयात्रेचे आयोजन करण्यात आले आहे. या पदयात्रेला मोठ्या संख्येने भाविकांनी सहभागी व्हावे, असे आवाहन आयोजन समितीतर्फे करण्यात आले आहे.

दरवर्षी परिसरातील भाविक महाशिवरात्र महादेवगड शिरपूर येथे जाऊन साजरी करतात. गेल्या दोन वर्षांपासून वणी ते शिरपूर अशी त्रिशूळयात्रा वणीतील भाविकांतर्फे काढली जात आहे. यावर्षी 250 किलोचा बाण, आकर्षक भव्य देखावे व शिवतांडव नृत्य हे यात्रेचे प्रमुख आकर्षण राहणार आहे. शिवाय स्थानिक टीमचे प्रात्यक्षिके यावेळी होणार आहे. तसेच भाविकांना अभिषेक देखील यावेळी करता येणार आहे. 

बुकिंगसाठी बॅनरवर क्लिक करा...

या पदयात्रेत जैन ले आऊट, आंबेडकर चौक, गणेशपूर, गोकुळनगर इत्यादी भागातील भाविक त्रिशूल घेऊन सहभागी होणार आहेत. वणी ते शिरपूर अशा निघणा-या मार्गात बाहेर गावातील भाविक देखील त्रिशूळ घेऊन जुळणार आहेत. टिळक चौक, खाती चौक, गांधी चौक, भगतसिंग चौक, रंगनाथ स्वामी मंदिर, गोकुळनगर, लालगुडा चौपाटी ते शिरपूर असा या त्रिशूल रॅलीचा मार्ग राहणार आहे. ठिकठिकाणी त्रिशूळयात्रेचे स्वागत केले जाणार आहे.

विविध कार्यक्रमांचे आयोजन – तारेंद्र बोर्डे
भाविकांचा प्रतिसाद पाहता व परंपरा सुरु ठेवण्यासाठी या वर्षी आणखी भव्य स्वरुपात ही त्रिशूल यात्रा निघणार आहे. उडता त्रिशूल तसेच आकर्षक देखावे या यात्रेचे प्रमुख आकर्षण राहणार आहे. या यात्रेची संपूर्ण तयारी झालेली आहे. यात्रेत सहभागी होणा-या सर्व भाविकांची काळजी आयोजकाद्वारे घेतली जाणार आहे.
– तारेंद्र बोर्डे, माजी नगराध्यक्ष

यात्रेला अधिकाधिक भाविकांनी सहभागी व्हावे असे आवाहन आयोजकांतर्फे करण्यात आले आहे. कार्यक्रमाच्या यशस्वीतेसाठी आयोजन समितीचे अध्यक्ष तारेंद्र बोर्डे, प्रशांत भालेराव, अनिल अक्केवार, नीलेश परगंटीवार यांच्यासह आयोजन समितीचे सदस्य व विविध सामाजिक संघटनेचे सदस्य परिश्रम घेत आहे.