अखेर मेंढोली येथील ‘त्या’ 24 कुटुंबांना 16 वर्षांनंतर मिळाले धान्य

बहुगुणी डेस्क, वणी: मेंढोलीतील पारधी बेड्यावर 24 कुटुंबांना रेशनसाठी तब्बल 50 ते 80 किलोमीटरपेक्षा अधिकचा प्रवास करून राळेगाव तालुक्यातून रेशनचे धान्य आणावे लागायचे. गेल्या अनेक वर्षांपासून त्यांची ही पायपिट सुरुच होती. वेळोवेळी त्यांनी याबाबत प्रशासनाकडे पाठपुरावा केला. मात्र तांत्रिक अडचणीमुळे त्यांच्या पदरी केवळ निराशाच आली. अखेर गेल्या महिन्यात त्यांचे रेशन कार्ड मिळाले होते. त्यानंतर आज शुक्रवारी त्यांना रेशनचे धान्य मिळाले. गेल्या अनेक वर्षांपासून धान्यासाठी होणारे हेलपाटे थांबल्याचा आनंद त्यांनी व्यक्त करत प्रशासनाचे आभार मानले. याबाबत माकपच्या नेतृत्त्वात पारधी बांधवांनी आंदोलन देखील केले होते. 

काय होती समस्या ?
पारधी समाजातील साधारणता 24 ते 25 कुटुंबं गेल्या 16 ते 17 वर्षांपूर्वी राळेगाव तालुका येथून स्थलांतरित होऊन मेंढोली या गावात आले. मात्र त्यांचे रेशन कार्ड राळेगाव तालुक्यातीलच होते. रेशनकार्ड राळेगाव तालुक्यातील असल्याने ते दर महिन्याला स्वस्त धान्य उचलण्यासाठी मेंढोली येथून राळेगाव तालुक्यात येथे जावे लागत होते. मेंढोली ते राळेगाव तालुक्यातील अंतर हे 50 ते 80 किलोमीटर पेक्षा अधिकचे आहे. त्यामुळे यात त्यांची रोजी तर बुडायची शिवाय त्यांना तिकीटचा आर्थिक भूर्दंडही बसायचा.

गेल्या सात महिन्यापूर्वी त्यांनी वणी तालुक्यातून रेशन कार्ड साठी अर्ज दाखल केला. परंतु लाभार्थीचे नाव राळेगाव तालुक्यातून कमी न झाल्याने त्यांचे अर्ज निकाली निघू शकले नाही. त्यांची ही समस्या लक्षात घेऊन ना. तहसिलदार विवेक पांडे यांनी राळेगाव येथील पुरवठा कार्यालयाला संपर्क साधला. तहसीलदार निखील धूळधर यांना याबाबत माहिती दिली. त्यांच्यामार्फत तहसील कार्यालय राळेगाव येथे संपर्क साधला गेला. अखेर त्यांची नावे रीतसर ऑनलाईन प्रणालीतून राळेगाव तालुक्यातून कमी करण्यात आले. नाव कमी झाल्यावर रेशन कार्ड तयार करण्याचा मार्ग मोकळा झाला व गेल्या महिन्यात त्यांचे रेशन कार्ड तयार झाले.

रेशन कार्ड तयार झाल्याने या कुटुंबाचा धान्य मिळण्याचा मार्ग मोकळा झाला. सर्व कुटुंबांना रेशनच्या धान्याची प्रतीक्षा होती. अखेर आज शुक्रवारी या सर्व कुटुंबांना रेशनचे धान्य मिळाले. याबाबतची माहिती त्यांच्याद्वारे प्रशासनाला देण्यात आली. त्यांनी प्रशासनाचे तसेच माकपचे आभार मानले.

बुकिंगसाठी बॅनरवर क्लिक करा...