रांगण्याजवळ ऑटो पलटी, एक प्रवासी ठार

विवेक तोटेवार, वणी: रांगणा-नांदेपेरा रोडवर ऑटो पलटी झाला. या अपघातात एक जण ठार झाला तर चार विद्यार्धी किरकोळ जखमी झाले आहेत. आज सकाळी 7.30 वाजताच्या सुमारास ही घटना घडली. ऑटो चालक शंकर पारटकर हा सेलू येथील रहिवासी आहे. तो सेलू ते वणी असा ऑटो चालवतो. आज बुधवारी दिनांक 4 ऑक्टोबर रोजी सकाळी 7 वाजताच्या सुमारास ऑटोचालक शंकर हा नेहमीप्रमाणे ऑटोने (MH29 V8137) सेलूहून काही प्रवाशांना सोबत घेऊन नांदेपेरा येथे गेला. तिथून त्याने काही कॉलेजच्या विद्यार्थ्यांना सोबत घेतले. ऑटोत घेऊन तो रांगणामार्गे वणीसाठी निघाला. त्यावेळी ऑटोत सुमारे 12 जण असल्याची प्राथमिक माहिती आहे. सकाळी 7.30 वाजताच्या सुमारास रांगण्याजवळ ऑटो चालकाचे ऑटोवरील नियंत्रण सुटले व ऑटो रस्त्याच्या बाहेर जाऊन पलटी झाला. यात गणपत धोंडू सातपुते (55) रा. सेलू हा गंभीर जखमी झाला. त्याला ग्रामीण रुग्णालयात दाखल केले असता डॉक्टरांनी त्याला मृत घोषीत केले. जे विद्यार्थी किरकोळ जखमी होते. त्यांना प्राथमिक उपचारानंतर सुटी देण्यात आली. ऑटो अचानक लॉक झाल्याने चालकाचे नियंत्रण सुटून हा अपघात झाल्याची माहिती ऑटोत असलेल्या विद्यार्थ्यांनी दिली.