सहकार हा सामाजिक-आर्थिक परिवर्तनाचा मार्ग – ऍड देविदास काळे

बहुगुणी डेस्क, वणी: सहकार हा सामाजिक-आर्थिक परिवर्तनाचा मार्ग आहे, असे मनोगत ऍड देविदास काळे यांनी व्यक्त केले.
आंतरराष्ट्रीय सहकार वर्ष 2025 च्या निमित्ताने श्री रंगनाथ स्वामी नागरी सहकारी पतसंस्थेचा मुकुटबन येथे भव्य सदस्य मेळावा पार पडला. कृषी उत्पन्न बाजार समितीच्या सभागृहात रविवारी, 5 ऑक्टोबर 2025 रोजी हा भव्य सोहळा आयोजित करण्यात आला. सहकाराच्या माध्यमातून सामाजिक आणि आर्थिक विकास साधण्याच्या उद्देशाने हा मेळावा आयोजित करण्यात आला यावेळी अध्यक्षीय भाषणात ते बोलत होते. या मेळाव्याला सभासदांचा मोठा प्रतिसाद लाभला. यावेळी संस्थेच्या आर्थिक बळकटीसाठी योगदान देणाऱ्या उत्कृष्ट ठेवीदार, कर्जदार आणि विस्तारासाठी परिश्रम घेणाऱ्या अभिकर्त्यांचा (एजंट्सचा) गौरव करण्यात आला.

उपाध्यक्ष विवेकानंज मांडवकर यांनी संस्थेच्या प्रवास, उद्देश आणि भविष्याच्या दिशेचा आढावा सादर करत सभासदांना प्रेरणा दिली. प्रा. कवडूजी नगराळे (संचालक, यवतमाळ जिल्हा सहकारी बोर्ड) यांनी मार्गदर्शन करताना सहकाराला समृद्धीचा मार्ग ठरवले. सहकार हा फक्त आर्थिक साधन नसून, समाजातील एकता आणि विकासाचा पाया आहे, असे ते मनोगतात म्हणाले. मेळाव्याचे वैशिष्ट्य ठरला तो सत्कार सोहळा, ज्यामध्ये संस्थेच्या आर्थिक बळकटीसाठी योगदान देणाऱ्या उत्कृष्ट ठेवीदार, कर्जदार आणि विस्तारासाठी परिश्रम घेणाऱ्या अभिकर्त्यांचा (एजंट्सचा) गौरव करण्यात आला. त्यांच्या समर्पणाबद्दल मान्यवरांनी कौतुकाची थाप दिली, ज्याने संस्थेच्या प्रत्येक घटकात नवचैतन्य निर्माण केले.

सहकार हा सामाजिक-आर्थिक परिवर्तनाचा मार्ग
सहकाराव्दारे सामाजिक-आर्थिक परिवर्तन शक्य आहे, आणि रंगनाथ स्वामी पतसंस्था या ध्येयाला कटिबद्ध आहे. हा प्रवास फक्त आर्थिक प्रगतीचा नाही, तर आमच्या सभासदांच्या जीवनात सकारात्मक बदल घडवण्याचा आहे. सहकार हा एक शक्तिशाली उपक्रम आहे, जो समाजातील प्रत्येक घटकाला बळकटी देऊ शकतो, विशेषतः ग्रामीण भागातील कुटुंबांना आर्थिक स्वावलंबन मिळवून देण्यासाठी. आम्ही भविष्यात नवीन योजना, तंत्रज्ञानाचा वापर आणि सभासदांच्या सहभागातून ही संस्था अधिक प्रगत करण्याचा आमचा मानस आहे. – ऍड देविदास काळे, अध्यक्ष

बुकिंगसाठी बॅनरवर क्लिक करा...

या मेळाव्यात संचालक पुरुर्षोत्तम बद्दमवार, सिंगारेड्डी अंडेलवार, परिक्षीत एकरे, सुधीर दामले, हरिशंकर पांडे, रमेश भोंगळे, सुरेश ता. बरडे, अॅड. घनश्याम निखाडे, डॉ. भुपाळराव पिंपळशेंडे, चिंतामण आगलावे, उदय रायपुरे, अरविंद ठाकरे, सुनिता देठे, छाया ठाकूरवार, निमा जीवने यांची प्रमुख उपस्थिती होती. वीरभद्र पाटील, राजू कासावार, राजू येल्टीवार, प्रकाश कासावार, संदीप बुर्रेवार, भूमारेड्डी बाजनलावार, केशवराव नखाते, विवेक गोडे, मारोतराव गौरकर, अंकुश माफूर, उत्तमराव गेडाम यांनीही विशेष सहभाग नोंदवला.

कार्यक्रमाचे नियोजन पतसंस्थेचे मुख्य कार्यकारी अधिकारी संजय दोरखंडे व शाखा व्यवस्थापक अमोत काळे यांच्या मार्गदर्शनात करण्यात आले. प्रवीण नांदे आणि अमित मांडवकर यांनी आयोजनात मोलाचे योगदान दिले. कार्यक्रमाचे सूत्रसंचालन पायल परांडे यांनी प्रभावीपणे केले, तर संचालक सुरेश बरडे यांनी उपस्थित मान्यवर, सभासद आणि सहकाऱ्यांचे मनःपूर्वक आभार मानले. हा मेळावा सहकाराच्या शक्तीचे प्रतीक ठरला, ज्याने सामाजिक एकतेला बळकटी देण्याचा संदेश दिला.