वृद्ध शेतक-याची कीटकनाशक प्राशन करून आत्महत्या

जितेंद्र कोठारी, वणी: कुर्ली शेतशिवारात एका वृद्धाने विषारी द्रव्य प्राशन करून आत्महत्या केली. शनिवारी दिनांक 8 जुलै रोजी संध्याकाळच्या सुमारास ही घटना उघडकीस आली. भीमा किसन आत्राम (65) रा. कुर्ली असे आत्महत्या करणा-या वृद्ध शेतक-याचे नाव आहे. शनिवारी भीमा हे नेहमी प्रमाणे त्यांच्या शेतात गेले होते. संध्याकाळच्या सुमारास त्यांनी त्यांच्या शेतात असलेले कीटकनाशक प्राशन केले. काही वेळाने परिसरात काम करणा-या शेतमजुरांच्या लक्षात ही बाब आली. मात्र तो पर्यंत त्यांचा मृत्यू झाला होता. त्यांनी तातडीने याची माहिती शिरपूर पोलिसांना दिली. पोलिसांनी घटनास्थळी जाऊन पंचनामा केला व मृतदेह उत्तरिय तपासणीसाठी वणी येथे पाठवला. आज दुपारी त्यांचा मृतदेह त्यांच्या नातेवाईकांच्या ताब्यात देण्यात आला. भीमा यांच्या पश्चात पत्नी, मुलगा, चार मुली व आप्तपरिवार आहे. आत्महत्येचे कारण अद्याप स्पष्ट झाले नाही.

बुकिंगसाठी बॅनरवर क्लिक करा...