20 वर्षांनंतर पुन्हा जुळले कॉलेज फ्रेंडचे मैत्रीचे धागे

बहुगुणी डेस्क, वणी: आयुष्याच्या धावपळीत हरवलेले मित्र, काळाच्या ओघात विरळ झालेल्या भेटी आणि महाविद्यालयीन दिवसांच्या मनात घर करून राहिलेल्या आठवणी… या साऱ्यांना पुन्हा एकदा उजाळा मिळाला तो लो.टी. महाविद्यालय, वणी येथील बी.ए. 2003–2006 बॅचच्या स्नेहमिलन सोहळ्यात. तब्बल 20 वर्षांनंतर एकत्र आलेल्या माजी विद्यार्थ्यांनी जुन्या आठवणींमध्ये रममाण होत मैत्रीचे बंध अधिक घट्ट केले.

रविवार, दि. 17 मे 2026 रोजी पार पडलेल्या या स्नेहमेळाव्याला माजी विद्यार्थी मोठ्या उत्साहाने उपस्थित होते. अनेकांच्या चेहऱ्यावर आनंदाश्रू होते, तर अनेकांनी जुन्या मित्रांना भेटताच घट्ट मिठी मारून भावना व्यक्त केल्या. “काळ बदलला, आयुष्य बदलले; पण मैत्री आजही तितकीच जिवंत आहे,” अशी भावना अनेकांनी व्यक्त केली.

कार्यक्रमाच्या अध्यक्षस्थानी विजय मुकेवार होते. यावेळी माजी प्राचार्य अनिल हूड, प्राचार्य प्रसाद खानझोडे, प्राचार्य धर्मेंद्र तेलगोटे, प्रा. दिलीप अलोणे आणि प्रा. अभिजित अणे यांची प्रमुख उपस्थिती लाभली. गुरुजनांच्या उपस्थितीमुळे कार्यक्रमाला विशेष भावनिक स्पर्श लाभला.

बुकिंगसाठी बॅनरवर क्लिक करा...

स्नेहमेळाव्याचे आयोजन दोन सत्रांमध्ये करण्यात आले. सकाळच्या सत्रात लो.टी. महाविद्यालय परिसरात माजी विद्यार्थ्यांनी आपल्या वर्गखोल्या, महाविद्यालयीन कट्टे आणि आठवणींना उजाळा दिला. जुन्या आठवणी सांगताना अनेक जण पुन्हा विद्यार्थीदशेत गेल्यासारखे झाले होते. काहींनी आपल्या करिअरमधील अनुभव कथन केले, तर काहींनी महाविद्यालयीन काळात मिळालेल्या संस्कारांमुळेच आयुष्यात यश मिळाल्याचे सांगितले.

गुरुजनांप्रती कृतज्ञता व्यक्त करताना अनेकांच्या भावना अनावर झाल्या. शिक्षकांनीही विद्यार्थ्यांच्या प्रगतीचा अभिमान व्यक्त करत “विद्यार्थ्यांचे यश हेच शिक्षकांचे खरे समाधान असते,” असे सांगितले.

सायंकाळच्या सत्रात महालक्ष्मी हॉल येथे आनंदाला अक्षरशः उधाण आले. सांस्कृतिक कार्यक्रम, संगीत, खेळ, गप्पा आणि हास्यविनोदांनी वातावरण रंगून गेले. मित्र-मैत्रिणींनी जुन्या आठवणींवर आधारित किस्से सांगत सभागृहात हास्याची कारंजी उडवली. अनेकांनी मोबाईल कॅमेऱ्यांत या क्षणांना कायमस्वरूपी बंदिस्त केले.

या स्नेहमेळाव्याच्या यशस्वी आयोजनासाठी अतुल गोंडे, राहुल ठेंगणे, गणेश गोखरे, जितू पाटील, सचिन मत्ते, मंगेश आवारी, प्रफुल क्षीरसागर, विजया बोढे, निलिमा म्हसे, कल्पना चटप आणि रेणू उसेवार यांनी विशेष परिश्रम घेतले. तसेच सर्व सहाध्यायींनी सक्रिय सहभाग नोंदवून कार्यक्रम संस्मरणीय केला.
हा स्नेहमेळावा केवळ जुन्या मित्रांना भेटण्यापुरता मर्यादित राहिला नाही, तर आयुष्यभर जपून ठेवाव्यात अशा भावनिक आठवणींचा एक सुंदर ठेवा बनून सहभागींच्या मनात कायमचा कोरला गेला.