कुलरचा शॉक लागून तरुणाचा मृत्यू

बहुगुणी डेस्क, वणी: तालुक्यातील शिरपूर पोलिस ठाण्याच्या हद्दीत येत असलेल्या पुनवट येथील एका २१ वर्षीय युवकाचा विजेचा शॉक लागल्याने मृत्यू झाला. ही घटना शुक्रवारी दिनांक 27 सप्टेंबर रोजी संध्याकाळच्या सुमारास घडली. तुषार श्यामराव मडावी असे मृत तरुणाचे नाव आहे. तो एका खासगी कंपनीत काम करायचा. तुषार हा आपल्या घरी सायंकाळी कुलर लावत असताना त्याला विजेचा जोरदार धक्का बसला. त्यामुळे तुषारचा जागीच मृत्यू झाला. ही बाब शेजारच्या नागरिकांना कळली. मात्र तेव्हा तुषारचा मृत्यू झाला होता. याबाबत कुटुंबीयांनी शिरपूर पोलिसांना माहिती दिली. पोलिसांनी घटनास्थळाचा पंचनामा करून मृतदेह उत्तरीय तपासणीसाठी वणी येथील ग्रामीण रुग्णालयात नेला. शनिवारी सकाळी मृतदेहाचे विच्छेदन करून मृतदेह नातेवाइकांकडे सोपविला. त्यानंतर त्याच्या मृतदेहावर शोकाकूल वातावरणात अंत्यसंस्कार करण्यात आले. या घटनेमुळे गावात हळहळ व्यक्त होत आहे.