सरन्यायाधीश भूषण गवईंवरील हल्ल्याविरोधात मारेगावात मोर्चा

भुषण कुमार, वणी: देशाचे सरन्यायाधीश मा. न्यायमूर्ती भूषण रामकृष्ण गवई यांच्यावर 6 ऑक्टोबर 2025 रोजी सर्वोच्च न्यायालयात सुनावणीदरम्यान झालेल्या घृणास्पद हल्ल्याचा वंचित बहुजन आघाडी, तालुका मारेगावच्या वतीने तीव्र निषेध करण्यात आला. या हल्ल्याला भारतीय संविधानावर आणि न्यायदानाच्या प्रक्रियेवर केलेला थेट हल्ला मानून, वंचित बहुजन आघाडीने आरोपीवर कठोर कायदेशीर कारवाई करून देशद्रोहाचा गुन्हा दाखल करण्याची मागणी केली आहे.

वंचित बहुजन आघाडीचे वणी विधानसभा प्रमुख राजू निमसटकर यांच्या नेतृत्वात मारेगाव येथील डॉ. बाबासाहेब आंबेडकर चौकातून मोठ्या संख्येने कार्यकर्ते तहसील कार्यालयावर धडकले. बाबासाहेबांच्या पुतळ्याला अभिवादन करून कार्यकर्त्यांनी मोर्चाचे रूप धारण केले. सर्वोच्च न्यायालयाच्या न्यायपीठावर खुद्द सरन्यायाधीशांच्या दिशेने जोडा फेकण्याचा प्रयत्न हा केवळ एका व्यक्तीवर केलेला हल्ला नसून भारतीय लोकशाही संस्थांचा आणि मूल्यांचा अनादर असल्याचे निवेदनात नमूद करण्यात आले.

वंचित बहुजन आघाडीने भारत सरकारकडे मागणी केली की, या घटनेतील आरोपी वकील राकेश किशोर याच्यावर केवळ निलंबनाची कारवाई न करता कठोर कायदेशीर कार्यवाही करण्यात यावी. न्यायव्यवस्थेची प्रतिष्ठा जपण्यासाठी आणि भविष्यात अशा घटनांना पायबंद घालण्यासाठी आरोपीवर देशद्रोहाचा गुन्हा दाखल करणे आवश्यक असल्याचे निवेदनात स्पष्ट करण्यात आले. न्यायव्यवस्थेच्या सर्वोच्च पदावरील व्यक्ती सुरक्षित नसतील, तर सामान्य नागरिकांचा न्यायव्यवस्थेवरील विश्वास डळमळू शकतो. त्यामुळे सरकारने तत्काळ लक्ष घालून न्यायव्यवस्थेच्या सुरक्षिततेसाठी ठोस पावले उचलावीत, अशी मागणी करण्यात आली.

बुकिंगसाठी बॅनरवर क्लिक करा...

मोर्चा तहसील कार्यालयावर पोहोचल्यावर मारेगावचे तहसीलदार यांनी वंचित बहुजन आघाडीचे निवेदन स्वीकारले. यावेळी वणी विधानसभा मतदारसंघाचे आमदार संजय देरकर यांनाही मागणीचे निवेदन सादर करण्यात आले. मोर्चादरम्यान ‘भारतीय संविधान जिंदाबाद’, ‘भारतीय लोकशाही जिंदाबाद’, ‘भारत देश जिंदाबाद’, ‘डॉ. बाबासाहेब आंबेडकर जिंदाबाद’ अशा घोषणांनी परिसर दणाणून गेला.

या वेळी ज्ञानेश्वर मुन, अनिल खैरे, अभिषा निमसटकर, यशोधरा लिहीतकर, अनंता खाडे, रवी तेलंग, रेखाताई काटकर, शोभाताई दारुंडे, विप्लव ताकसांडे, संजय जीवने, अमरनाथ तेलतुंबडे, गौतम ताकसाडे, धम्मपाल दारुंडे, वसूमित्र वनकर, विजय खाडे, प्राणशील पाटील, गंगाधर तेलंग, चिंतामण वेले, सलीम अहमद कुरेशी, अजय चंदनखेडे, बबन हस्ते, रवी वनकर, राजानंद गांजरे, रमेश चिकाटे, सुमित हस्ते, दीक्षा गजभिये, कामिनीबाई खैरे, निळावती मुन, लक्ष्मीकांत तेलंग, राजू पाटील, शेख दिलदार सेख शीकंदर, धीरज लोखंडे, धनराज मुन, विनेश मेश्राम, यशवंत भरणे,

स्वाती दारुंडे, सुकेसनी लिहितकर, गौतम मालखेडे, अजबराव गजभिये, ईश्वर वानखेडे, दीपा तेलंग, ज्ञानेश्वर धोपटे, गौतम दारुडे, राहुल नंदुरकर, किरण लढे, कविता ताकसांडे, ताराबाई मेश्राम, पुष्पा ताकसाडे, वंदना रायपुरे, दीपा तेलंग, वंदना वासेकर, तात्याजी चिकाटे, सुनील वाघमारे, प्रफुल भगत, प्रवीण नरांजे, मनोज चंदनखेडे, गौतम कवाडे यांच्यासह वंचित बहुजन आघाडीचे पदाधिकारी व कार्यकर्ते मोठ्या संख्येने उपस्थित होते.